የሕይወቴ ዋነኛ የተስፋ ቃል፦ እግዚአብሔር ተስፋዬን ያጸናበት መንገድ
አንዳንድ ቃላት ነፍሳችሁን ሰርስረው በመግባት አስተሳሰባችሁን በተስፋ መሙላት እና ስለ ሁሉም ነገሮች ያላችሁን አተያይ መቀየር ይችላሉ። በሮሜ 8፥32 ሐዋርያው ጳውሎስ ሁሉን ስለሚያጠቃልለው የሰማዩ አመክንዮ የተናገረውን ስሰማ፣ ለእኔ የሆነውም እንዲሁ ነው። በወቅቱ 23 ዐመቴ ነበር።
ይህንን ጥቅስ ከዚህ በፊት ከነበረኝ አረዳድ በተለየ መልኩ ስመለከተው፣ በሕይወት ዘመኔ ሁሉ የምጠቀምበት ተስፋ ሰጪ እና ሕይወት ቀያሪ ቃል አድርጎ እግዚአብሔር በልቤ ተክሎታል።
በዙሪያዬ ያሉ ነገሮች ሁሉ ሲናወጡ፣ መጽሐፍ ቅዱስ ውስጥ ካሉ መጽናኛ ቃላት ሁሉ ይህ ለእኔ የማዕዘን ድንጋይ ሆኖልኛል።
“ለገዛ ልጁ ያልሳሳለት፣ ነገር ግን ለሁላችንም አሳልፎ የሰጠው እርሱ፣ ሁሉንስ ነገር ከእርሱ ጋር እንደ ምን በልግስና አይሰጠን?” (ሮሜ 8፥32)
የሰማዩ አመክንዮ
ሮሜ 8፥32 የመጽሐፉ የመጀመሪያ 8 ምዕራፎች ክርክር ዋነኛ ማጠቃለያ ነው። ከመልእክቶች ሁሉ ታላቅ የሆነውን የዚህን መጽሐፍ ይህን መልእክት “የሰማይ አመክንዮ” ብዬ እጠራዋለሁ።
ይህ አመክንዮ በላቲን ቋንቋ ‘ፎርቲኦሪ’ ይባላል፤ ሐሳቡ ሲብራራም፣ ከባድ ነገር ለማድረግ አቅም ካለን፣ ቀላሉን ነገር ማድረግ አያቅተንም በሚል ይገለጻል። ለምሳሌ፣ ልጃችሁ ጎረቤት ሄዶ አንድ ዕቃ እንዲያመጣ ስታዙት፣ እንዴት ዕቃውን እንደሚሰጡኝ ርግጠኛ መሆን እችላለሁ? ብሎ ቢጠይቃችሁ ይህን ‘ፎርቲኦሪ አመክንዮ’ ትጠቀማላችሁ፤ ልጃችሁንም ጎረቤታችን ትላንት መኪናውን ሊሰጠን ፈቃደኛ ነበር፤ ስለዚህ ዛሬ ይህንን ትንሽ ዕቃ ለመስጠት አይቸገርም ትሉታላችሁ።
የጳውሎስ ድንቅ ‘ፎርቲኦሪ’
ጳውሎስ ይህንን አመክንዮ በዓለም ታሪክ ውስጥ ታላቅ የሆነውን ክስተት ለማስረዳት ይጠቀምበታል። እግዚአብሔር አንድያ ልጁን ለእኛ አሳልፎ ሰጠ እንጂ አልሰሰተውም። ከባዱ ነገር ይህ ነበር። ስለዚህ ሁሉን ደግሞ ለእኛ አሳልፎ ይሰጠናል። ይህ ቀላሉ ነገር ነው። ይህ አመክንዮ በእውነት ሲገባን ሁሉን አቀፍ እና በተስፋ የተሞላ እውነት ይሆንልናል። ይህን ቃል ከዚህ በፊት ብዙ ጊዜ አንብቤዋለሁ፤ ነገር ግን በ23 ዐመቴ ይህ በእግዚአብሔር የተገለጠ፣ ቅዱስ፣ ሰማያዊ እና የከበረ ቃል ወደ ልቤ ገብቶ የማይነቃነቅ የማዕዘን ድንጋይ ሆኗል። ይህ ለምን እንደ ሆነ አብራራለሁ፤ በቅድሚያ ግን በጥቅሱ ሁለት ክፍሎች ላይ እናተኩር።
ጳውሎስ በዚህ ቦታ በዓለም ታሪክ ውስጥ ታላቅ ለሆነው ክስተት እንዲህ ያለውን ክርክር ሲጠቀም ተመልከት። እግዚአብሔር ለገዛ ልጁ አልራራለትም፤ ነገር ግን ስለ ሁላችን አሳልፎ ሰጥቶታል። ይህ በጣም ከባዱ ነገር ነው። ስለዚህም እርሱ ከራሱ ጋር ሁሉንም ነገር በርግጥ ይሰጠናል። ይህ ቀላሉ ነገር ነው። ይህ ሙግት በተጠራጣሪ አእምሮ ውስጥ ዘልቆ ሲገባ፣ በክብር የተሞላ እና ዘላቂ ተስፋ ይሆናል።
በሕይወቴ ከዚያች ቀን በፊት ይህን ጥቅስ ደጋግሜ አንብቤ ነበር። እናም ለመጀመሪያ ጊዜ፣ ይህ በእግዚአብሔር መንፈስ መሪነት የተፈጠረ አመክንዮ ማለትም ቅዱስ፣ ሰማያዊ፣ ክብር ያለው ይህ አመክንዮ ወደ ነፍሴ ውስጥ ዘልቆ ገባ፤ ተተከለም። የማይናወጥ መሠረት፣ ሕያው የተስፋ እና የኀይል ምንጭ ሆነኝ። ምክንያቱን ቀጥዬ እገልጻለሁ። ግን ከዚያ በፊት በዚህ ጥቅስ ሁለት ክፍሎች ይዘት ላይ ለአንድ አፍታ ከእኔ ጋር አተኩር።
ለዘላለም ደስታ ታላቁ እንቅፋት
በቅድሚያ ስለ ሮሜ 8፥32 የመጀመሪያ ክፍል እናሰላስል። “ለገዛ ልጁ ያልሳሳለት፣ ነገር ግን ለሁላችንም አሳልፎ የሰጠው እርሱ…”
ለዘላለም ደስታችን እንቅፋት የሆኑት ምንድን ናቸው? አንዱ ኀጢአት ነው። ሁላችንም ኀጢአተኞች ነን (ሮሜ 3፥23)፤ የኀጢአት ደሞዝ ደግሞ ሞት ነው (ሮሜ 6፥23)። ሌላኛው እንቅፋት የእግዚአብሔር ቁጣ ነው። እግዚአብሔር በኀጢአታችን ምክንያት ሁሌም በእኛ ላይ የሚቆጣ ከሆነ ዘላለማዊ ደስታ ሊኖረን አይችልም። ጳውሎስም በእግዚአብሔር ቁጣ ሥር መሆናችንን በግልጽ ይናገራል፦ “እንደ ሌሎቹም የቍጣ ልጆች ነበርን” (ኤፌሶን 2፥3)።
እኔ ግን አንድ ተጨማሪ እና ዋነኛ እንቅፋት ያለ ይመስለኛል። ጳውሎስም በጥቅሱ የመጀመሪያ ክፍል ይናገረዋል (ሮሜ 8፥32)፤ እርሱም እግዚአብሔር ለልጁ ያለው የማያልቅ ፍቅር ነው። እግዚአብሔር አሳልፎ የሰጠን የሚወደውን የራሱን ልጅ ነው፤ ይህ ለእርሱ እጅግ ከባድ እንደ ነበረ መገመት አያቅተንም።
እግዚአብሔር የራሱን ልጅ አሳልፎ መስጠት ይችላልን?
ጳውሎስ፣ ኢየሱስን የእግዚአብሔር የገዛ ልጁ ብሎ ሲጠራው እንደ እርሱ ያሉ ሌሎች እንደሌሉና ምን ያህል ለአባቱ ውድ እንደ ሆነ ለመግለጽ ነው። ኢየሱስ በምድር ሳለ እግዚአብሔር ሁለት ጊዜ “ይህ የምወደው ልጄ ነው” ብሎ ተናግሯል (ማቴዎስ 3፥17 ፤ 17፥5)። ኢየሱስ ራሱ በገበሬዎቹ ምሳሌ ላይ ሲናገር፣ “አሁንም የሚላክ ሌላ ነበረው፤ እርሱም የሚወድደው ልጁ ነበረ” ብሏል (ማርቆስ 12፥6)። የሮሜ 8፥32 ዋነኛ ሐሳብ እግዚአብሔር ለልጁ ያለው ፍቅር በእርሱ እና በድኅነታችን መካከል ምን ያህል ታላቅ የሆነ እንቅፋት እንደ ነበር ማሳየት ነው። እግዚአብሔር በእውነት ልጁ እንዲሰደብ፣ እንዲተፋበት፣ እንዲገረፍ፣ በመስቀል ላይ እንዲሰቀል፣ በጦር እንዲወጋ አሳልፎ ይሰጠዋልን?
እግዚአብሔር ለልጁ አልራራለትም
እግዚአብሔር በእውነት ልጁን አሳልፎ ከሰጠ፣ የወደፊት ዕቅዱ ፈጽሞ እንደማይበላሽ ርግጠኛ መሆን አለበት ማለት ነው። ሮሜ 8፥32 እንደሚነግረን እግዚአብሔር እውነትም ልጁን አሳልፎ ሰጠው። ‘ይሁዳ አይደለም እንዴ አሳልፎ የሰጠው?’ ልትሉ ትችላላችሁ (ማርቆስ 3፥19)፤ ‘ጲላጦስ አይደለም እንዴ አሳልፎ የሰጠው?’ ልትሉ ትችላላችሁ (ማርቆስ 15፥15) ፤ ‘ሄሮድስ እና ሕዝቡ አይደሉም እንዴ አሳልፈው የሰጡት?’ ልትሉ ትችላላችሁ (የሐዋርያት ሥራ 4፥27-28)፤ ከሁሉ የከፋው ደግሞ ‘እኛ ራሳችን አሳልፈን አልሰጠነውም እንዴ?’ ልትሉ ትችላላችሁ (1 ቆሮንቶስ 15፥3፤ ገላትያ 1፥4፤ 1ጴጥሮስ 2፥24)፤ ከሁሉ የሚገርመው ደግሞ ‘ኢየሱስ ራሱን አሳልፎ አልሰጠምን?’ (ዮሐንስ 10፥17 ፤ 19፥30) የሚለው ሲሆን፣ ለእነዚህ ጥያቄዎች ሁሉ መልሱ ‘አዎ’ የሚል ነው።
ቢሆንም ግን በሮሜ 8፥32 ጳውሎስ እያለን ያለው ከእነዚህ ሁሉ ውሳኔዎች ጀርባ፣ እግዚአብሔር እነዚህን ሁሉ ሰዎች ተጠቅሞ ልጁን ለሞት አሳልፎ እንደ ሰጠ ነው። “እግዚአብሔር በጥንት ውሳኔውና በቀደመው ዕውቀቱ ይህን ሰው አሳልፎ በእጃችሁ ሰጣችሁ” (ሐዋርያት ሥራ 2፥23)። ይሁዳ፣ ጲላጦስ፣ ሄሮድስ እና ሌሎቹንም ተጠቅሞ እግዚአብሔር ልጁን አሳልፎ ሰጠ። ከዚህ የከበደ ነገር ሆኖም አያውቅም፤ ወደ ፊትም አይሆንም።
የአመክንዮው ቀላሉ ክፍል
ስለዚህ በጳውሎስ “ፎርቲኦሪ” አስተሳሰብ፣ እግዚአብሔር ዘላለማዊ ደስታን እውን ለማድረግ ከባዱን ነገር አድርጓል። የገዛ ልጁን አሳልፎ ሰጥቶናል። ይህ ታዲያ የሚያረጋግጠው ምንን ነው? ጳውሎስ ጥያቄውን በጥያቄ ይመልስልናል፦ “ሁሉንስ ነገር ከእርሱ ጋር እንደ ምን በልግስና አይሰጠን?” ጳውሎስ ከአንባቢው የሚጠብቀው ርግጠኝነትን ሲሆን እርሱም “እንዴታ! በርግጥ ከእርሱ ጋር ሁሉንም ነገር በቸርነቱ ይሰጠናል” የሚል ነው።
ሙሉውን ጥቅስ ስንመለከት፣ “ለገዛ ልጁ ያልሳሳለት፣ ነገር ግን ለሁላችንም አሳልፎ የሰጠው እርሱ፣ ሁሉንስ ነገር ከእርሱ ጋር እንደ ምን በልግስና አይሰጠን?”
“ሁሉንስ ነገር!” ይህ ማለት ከችግር ነፃ የሆነ ሕይወት ቃል ተገብቶልናል ማለት አይደለም። ጳውሎስ አራት ቁጥሮችን ዝቅ ብሎ “ስለ አንተ ቀኑን ሙሉ ከሞት ጋር እንጋፈጣለን፤ እንደሚታረዱ በጎች ተቈጠርን” ብሎ ጽፏል (ሮሜ 8፥36)።
ሁሉንም ነገር ይሰጠናል ማለት የእርሱን ፈቃድ ለማስፈጸም፣ እርሱን ለማክበር፣ ለመዳን፣ ለዘላለማዊ ደስታ የሚያስፈልጉንን ሁሉንም ነገሮች ይሰጠናል ለማለት ነው (ሮሜ 8፥30)።
- ነገር ሁሉ ተያይዞ ለበጎ እንዲሠራ እንደሚያደርግላቸው እናውቃለን (ቁ. 28)
- የልጁን መልክ እንዲመስሉ አስቀድሞ ወሰናቸው (ቁ. 29)
- ያጸደቃቸውን አከበራቸው (ቁ. 30)
- ማን ሊቃወመን ይችላል? (ቁ. 31)
- የመረጣቸውን የሚከስ ማን ነው? (ቁ. 33)
- ከክርስቶስ ፍቅር የሚለየን ማን ነው? (ቁ. 35)
- ከክርስቶስ ፍቅር የሚለየን ማን ነው? ችግር ነው ወይስ ሥቃይ፣ ወይስ ስደት፣ ወይስ ራብ፣ ወይስ ዕራቍትነት፣ ወይስ አደጋ፣ ወይስ ሰይፍ? ምንም አይለየንም፤ በዚህ ሁሉ በወደደን በእርሱ ከአሸናፊዎች እንበልጣለን (ቁ. 35-37)
- ይህን ተረድቻለሁ፤ ሞትም ይሁን ሕይወት፣ መላእክትም ይሁኑ አጋንንት፣ ያለውም ይሁን የሚመጣው፣ ወይም ማንኛውም ኀይል፣ ከፍታም ይሁን ጥልቀት ወይም የትኛውም ፍጥረት፣ በጌታችን በኢየሱስ ክርስቶስ ካለው ከእግዚአብሔር ፍቅር ሊለየን አይችልም (ቁ. 38-39)
ተስፋዬ በሮሜ 8፥32 ላይ የተንጠለጠለ ነው
አሁን ወደ መጀመሪያው እንመለስ። በ23 ዐመቴ ይህ ቃል ወደ ልቤ ገብቶ ነገሮችን የማይበትን አተያይ ሁሉ እንደ ቀየረ እና ሙሉ ተስፋ እንደ ሰጠኝ ተናግሬ ነበር። ምን ማለቴ ነው? ይህ ሰማያዊ አመክንዮ እግዚአብሔር ልጁን ሳይራራ አሳልፎ መስጠቱ እስከዛሬ የማምንበትን ወይም ወደ ፊት የማምነውን የተስፋ ቃል ሁሉ ያረጋግጥልኛል ማለቴ ነው። በእያንዳንዱ ቀን ሕይወቴን የምኖረው በእግዚአብሔር የተስፋ ቃላት ምሪት ነው። የተስፋ ቃሎቹም ማረጋገጫ ሮሜ 8፥32 ነው። ይህ እንዴት አስፈላጊ እንደ ሆነ አያችሁ?
ጳውሎስ “በእግዚአብሔር የተሰጡ ተስፋዎች ሁሉ፣ “አዎን” የሚሆኑት በእርሱ ነውና” ይላል (2 ቆሮንቶስ 1፥20)። ይህ የሆነው አብ ልጁን አሳልፎ ለመስጠት ስላልራራ ነው። ከፍርሀት፣ ስግብግብነት፣ ንዴት፣ ኩራት ወዘተ ጋር የማደርገው ተጋድሎ ሁሉ በእግዚአብሔር የተስፋ ቃል የሚመራ ነው ማለት ነው። ልክ እንዲሁ ለቅድስና፣ ለትሕትና፣ ለሰላም እና ለፍቅር የማደርገውም ተጋድሎ በእግዚአብሔር ቃል የተስፋ ቃሎች ላይ የሚደረጉ ትግሎች ናቸው።
ከእነዚህ ሁሉ ተጋድሎዎች ጀርባ ይህ ሰማያዊ አመክንዮ አለ፦ ‘ልጄን አሳልፌ ለመስጠት አልራራሁም፤ ስለዚህ ለአንተ/አንቺ የገባሁት ቃል ፈጽሞ አይወድቅም። እኔ አግዛችኋለሁ፤ ስለዚህ እንድታደርጉ የጠራኋችሁን አድርጉ።”
በጆን ፓይፐር
